पुणे : भारती विद्यापीठ आणि सेस न्यूफिल्ड-फ्लेम युनिव्हर्सिटी यांच्यात संशोधन उपक्रमांसाठी सहकार्य करार करण्यात आला असून, त्यानुसार या दोन्ही विद्यापीठांत संशोधन उपक्रमांमध्ये आता एकत्रित काम केले जाणार आहे, अशी माहिती भारती विद्यापीठाच्या इन्स्टिट्यूट ऑफ मॅनेजमेंट अँड आंत्रप्रुनरशिप डेव्हलपमेंटचे (आयएमइडी) संचालक डॉ. सचिन वेर्णेकर यांनी दिली.
भारती विद्यापीठाचे कुलपती डॉ. शिवाजीराव कदम यांच्या मार्गदर्शनाखाली हा सहकार्य करार झाला. या करारानुसार ‘सेल्स ट्रान्सफॉर्मेशन अँड कस्टमर एंगेजमेंट’ विषयावर पहिला मॅनेजमेंट डेव्हलपमेंट प्रोग्रॅम चार डिसेंबर २०१८रोजी फ्लेम युनिव्हर्सिटी (लवळे) येथे आयोजित केला होता.
‘सेस न्यूफिल्ड’चे संचालक डॉ. शेरॉन बर्नहार्ड आणि सेस न्यूफिल्ड-फ्लेम युनिव्हर्सिटीचे संचालक डॉ. पवन मामिदी यांनी या मॅनेजमेंट डेव्हलपमेंट प्रोग्रॅममध्ये मार्गदर्शन केले. यात ‘आयएमईडी’चे सर्व प्राध्यापक सहभागी झाले होते. डॉ. सौम्या संपत यांनी स्वागत केले. सोनाली खुर्जेकर यांनी आभार मानले.
(Please click here to read this news in English.)